Жыхар Глыбокага распілаваў сейф «балгаркай» і выцягнуў з яго валюты на 13 000 рублёў у эквіваленце. 

У міліцыю райцэнтра звярнуўся кіраўнік адной з мясцовых фірмаў, які заявіў, што хтосьці ўночы пракраўся ў кабінет дырэктара і пры дапамозе УШМ ускрыў сейф, адкуль выкраў валюту ў эквіваленце больш за 13 000 рублёў.

Высвятлілася, што «мядзведнік» старанна абыходзіў камеры відэаназірання, увесь час знаходзячыся ў іх сляпых зонах, што казала пра старанную падрыхтоўку да злачынства.

Нягледзячы на прадпрынятыя зламыснікам меры канспірацыі, сілавікі выйшлі на яго след. Па падазрэнні ў здзяйсненні налёту на офіс фірмы затрымалі неаднаразова асуджанага 30-гадовага жыхара Глыбокага, які два гады назад пасля вызвалення паспеў папрацаваць на гэтым прадпрыемстве.

Да моманту затрымання глыбачанін паспеў выдаткаваць частку здабычы на куплю двух тэлефонаў і дробныя выдаткі, аднак вялікую частку выкрадзенай валюты атрымалася канфіскаваць, паведамляе прэс-служба ЎУС Віцебскага аблвыканкама.

У адносінах да маладога чалавека ўзбудзілі крымінальную справу. Зараз ён можа адправіцца ў тыя месцы, адкуль два гады назад вярнуўся, ужо на сем гадоў.