4 снежня ў Глыбоцкім раёне загінуў 41-гадовы мужчына, які адправіўся на зімовую рыбалку.

Трагедыя адбылася на возеры Белае ў Падсвіллі. Два браты прыйшлі на возера, каб парыбачыць, адзін з іх выйшаў на лёд і стаў секчы сякерай лунку. У нейкі момант мужчына рэзка праваліўся пад лёд.

Другі брат выклікаў выратавальнікаў, але да іх прыезду на паверхні лёду ў палонцы ляжалі толькі снасці.

Пазней цела патанулага рыбака з вады дасталі вадалазы ОСВОД, паведамляецца прэс-службай МНС.

За дзень да гэтага на возеры Варонь у Мёрскім раёне пад лёд праваліўся 56-гадовы мужчына, яго паспелі выратаваць іншыя рыбакі.

А 30 лістапада на возеры Бараўлянскае пад Віцебскам патануў 39-гадовы віцяблянін.

Зоя Машэка