Больш 20 гадоў начальнік прымушаў працоўных чыгункі апрацоўваць яго асабісты ўчастак, пакуль у жніўні 2021 года брыгада не напісала калектыўны ліст на імя начальніка Віцебскага аддзялення Беларускай чыгункі.

На лаве падсудных апынуўся мужчына, які з 1986 года працаваў майстрам аднаго з вытворчых участкаў дыстанцыі ахоўных лесанасаджэнняў.

Па дадзеных следства з восені 2000 года па вясну 2021 года начальнік прымушаў падначаленых працаваць у яго інтарэсах. Усяго на “фазэндзе” ў майстра пабывалі 15 чалавек.

Яны касілі і сушылі яму сена, саджалі і выкопвалі бульбу, дапамагалі будаваць і рамантаваць пабудовы, а таксама рэзаць свінню.

Працоўныя чамусьці маўчалі пра такую эксплуатацыю. Прынамсі, вышэйстаячае начальства чыгункі на судзе сцвярджала, што нічога пра падобныя парушэнні не ведала.

Пры гэтым яны збіралі кампрамат на начальства: да справы прыкладзены фота і відэазапісы, дзе працоўныя ўчастка грабуць для майстра сена і капаюць бульбу, на адным з відэа пацярпелы нават паднімае руку і крычыць: “Мы — рабы!”.

Акрамя таго, вясковец, як службовая асоба, выкарыстоўваў у асабістых мэтах службовыя аўтамабіль “УАЗ” і трактар “МТЗ”.

Усё  ж,  па ацэнцы суда, сваімі дзеяннямі майстар нанёс чыгунцы шкоду на агульную суму не меней за 8058 рублёў 2 капеек.

На судзе віну мужчына прызнаў толькі часткова. Галоўным чынам ён сцвярджаў, што прыцягваў працоўных для працы ў асабістай дапаможнай гаспадарцы толькі ў непрацоўны час. А сена яны нарыхтоўвалі для службовага каня, якім карысталіся ўсё.

16 снежня суд Пастаўскага раёна прызнаў ужо былога майстра вінаватым у злоўжыванні службовымі паўнамоцтвамі. На падставе часткі 2 артыкулы 424 КК яго прысудзілі да дзвюх з паловай гадоў пазбаўлення волі і штрафу ў 9600 рублёў. Аднак выкананне асноўнага пакарання ў выглядзе пазбаўлення волі карупцыянеру адтэрмінавалі на два гады.

Сяржук Серабро .