Па ўсёй Беларусі з больш як трох тысяч уладальнікаў аграсядзіб толькі 1,6 тысячы звярнуліся па дазвол у мясцовыя выканкамы, піша «СБ. Беларусь сегодня», спасылаючыся на юрысконсульта Дэпартамента турызму Міністэрства спорту і турызму Аляксандра Крэчатава.

З 1 ліпеня ўладальнікі аграсядзіб у Беларусі павінны былі перайсці на падатак на прафесійны даход, а таксама перарэгістравацца.

Выданне паведамляе, што на гэты момант 1,2 тысячы з тых людзей, якія падалі дакументы, атрымалі дазвол на працяг дзейнасці.

Паводле ўказа аб развіцці аграэкатурызму, прынятага ў канцы 2022 года, прымаць турыстаў змогуць толькі тыя, хто атрымаў дазвол ад выканкама. Атрымаць дазвол трэба было да 1 ліпеня 2023 года.

На пачатак 2023 года ў Беларусі налічвалася 3043 аграсядзібы, з іх дзейнічала 2199.